Atvinnulausir og þeir sem þiggja fjárhagsaðstoð fái frítt í sund og fleira
April 21st, 2010 // 10:49 am @ Þorleifur Gunnlaugsson // Engar athugasemdir
Ræða í borgarstjórn 20.apríl 2010
Forseti, borgarfulltrúar. Með leyfi forseta flyt ég tillögu sem að hluta til er samhljóða tillögu sem ég flutti hér í borgarstjórn 16. mars síðastliðinn. Tillagan fjallar um það að atvinnulausum og fólki á fjárhagsaðstoð verði gert kleift að sækja sundstaði borgarinnar sér að kostnaðarlausu en við hana er nú bætt tillögu um að það sama gildi um bókasöfn borgarinnar. Það er nú svo í mínum huga allavega að þessi tillaga er neyðarbrauð. Hún túlkar þá staðreynd að hér í borg er fólk sem ekki hefur efni á því að veita sér það sem öðrum finnst vera sjálfsagt. Hún túlkar þá staðreynd að í borginni okkar er fátækum að fjölga.
Fátækt er í sjálfu sér afstætt hugtak og þegar kemur að tölfræðinni skiptir náttúrlega máli að skilgreiningar séu á hreinu. Evrópusambandið og OECD tala um afstæð fátæktarmörk. Þá er fólk skilgreint sem fátækt ef tekjur þess fara undir fyrirfram skilgreint hlutfall af tekjum tiltekins viðmiðunarhóps. Í tilfelli Evrópusambandsins sem notar þessa aðferð við mælingar á fátækt meðal aðildarríkja, er þar miðað við að einstaklingur sé fátækur ef tekjur hans eru lægri en 50% af miðgildi ráðstöfunartekna landa hans. Í þeim mælingum er einnig tekið tillit til fjölskyldustærðar og reiknað með að maki þurfi 70% af tekjum sambýliskonu eða -manns og börn þarfnist 50% af tekjum fullorðinnar manneskju. Því miður hafa ekki verið að mér vitandi reiknuð út fátækramörk á Íslandi en það er að sjálfsögðu nauðsynlegt að gera, hafi það ekki verið gert, þá er nauðsynlegt að gera það þannig að umræðan við þessar aðstæður verði á vitrænu stigi.
Skýrsla rannsóknarnefndar Alþingis, sem rædd verður hér á eftir, hefur tröllriðið allri umræðu undanfarna daga. Í skugga skýrslunnar var haldin stórmerkileg málstofa á vegum Seðlabanka Íslands undir heitinu „Hvernig hefur staða heimilanna breyst á undanförnum árum og hverju fá aðgerðir í þágu heimilanna áorkað?“ Þar voru frummælendur þau Karen Á. Vignisdóttir og Þorvarður Tjörvi Ólafsson sem eru bæði hagfræðingar Seðlabankans. Þeirra málflutningur og glærurnar sem þau notuðust við má sjá á heimasíðu Seðlabankans og ég hvet ykkur til að skoða þær. Ég ætla svo sem ekki að kafa djúpt í þær núna enda er þar um að ræða, að mati okkar, borgarfulltrúa Vinstri grænna, dagskrárefni út af fyrir sig. Við leggjum sem sagt til að staða heimilanna með tilliti til aukinnar fátæktar verði sett á dagskrá næsta fundar borgarstjórnar. Ég vil þó nefna að í máli hagfræðinganna kemur það fram að 14% heimila ná ekki endum saman og að 8% að auki eigi í mesta basli með að ná endum saman. Að um 28.000 heimili séu með neikvæða eiginfjárstöðu og þegar staða barnafólks þar sem allt heimilisfólk er yngra en 40 ára er skoðuð kemur í ljós að eiginfjárstaðan er neikvæð hjá 65% þeirra. Að 20% einstæðra foreldra nái ekki endum saman og 15% til viðbótar séu á mörkunum. Og þá kemur náttúrlega ekki á óvart að af 8.850 heimilum með tekjur um eða undir 150.000 kr. á mánuði er 80% þeirra í sérstökum vanda. 80% af 8.850 heimilum.
Og það er einmitt þetta fólk sem ætti að njóta góðs af tillögunni sem hér er lögð fram. Í ræðunni sem ég flutti hér 16. mars rakti ég feril þessa máls. Munnlega tillögu sem ég vísaði til aðgerðahóps borgarráðs í desember 2008 en á þeim tíma vorum við að reikna með 7% atvinnuleysi, og fannst það alveg svakalegt. Ég held að það sé um 10% í dag. Atvinnumálahópurinn undir forystu Svandísar Svavarsdóttur sendi borgarráði skýrslu 16. febrúar 2009 þar sem lagt var til að athugaður yrði sá kostur að bjóða atvinnulausum frítt í sund og á bókasafn til að tryggja samfélagslega virkni þeirra. Ég fór í gegnum kostnað borgarinnar vegna tillögunnar og ætla ekki að gera það aftur hér, ég fór nokkuð nákvæmlega í gegnum mögulegan kostnað, það er erfitt að reikna þetta út nákvæmlega, en að mínu mati er hann ekki verulegur miðað við þau gæði sem af tillögunni hljótast.
Forseti, borgarfulltrúar. Íþrótta- og tómstundasvið Reykjavíkur rekur sjö sundlaugar. Í þjónustu sundlauganna birtist vel sá þáttur í menningu borgarbúa sem við tengjum við heilbrigða lífshætti, jafnframt því sem segja má að sundlaugarnar séu aldingarðar Íslands, þar sem íbúarnir, í stað þess að sitja á bekkjum garðanna, sitja á bekkjum pottanna og ræða málin, hvernig sem veðrið er. Og menning okkar á sér einnig djúpar rætur í bókasöfnum borgarinnar. Grunnurinn að Borgarbókasafninu sem var stofnað 1919 var lagður með fé sem fékkst við sölu á fiskibátum sem borgin átti og seldi til Frakklands, þetta var verið að segja mér áðan. Stofnun alþýðubókasafns var einmitt eitt af skilyrðum fyrir sölunni. Borgarbókasafn hefur ávallt verið mikilvægt en líklega aldrei sem nú þar sem þjónusta og safnkostur þess veitir aðgang að öllum þeim upplýsingum sem hægt er að hugsa sér auk þess sem hæft starfsfólk safnana getur auðveldað gestum leit sína að þeim upplýsingum sem þeir sækjast eftir. Mikil fjölgun atvinnulausa og fólks á fjárhagsaðstoð hefur kallað á virkniáætlun sem verið er að ýta úr vör. Að forða fólki frá þeirri deyfð og því þunglyndi sem fylgt getur aðgerðaleysinu og hjálpa því aftur inn á vinnumarkaðinn og til almennrar virkni er þetta og þessi tillaga þjóðhagslega hagkvæm. Hvatning til sundferða og heimsókna á bókasöfn getur átt stóran þátt í að auka lífsgæði atvinnulausra og þeirra sem njóta fjárhagsaðstoðar. En eins og áður sagði er tillagan sem hér er lögð fram í raun neyðarbrauð.
Samfélag sem sættir sig við fátækt íbúa sinna er ekki gott samfélag. Sú þróun sem við horfum upp á þar sem æ fleiri fara niður fyrir fátæktarmörk er ekki það sem við viljum. Ég, sem félagshyggjumaður, hlýt að gera þá kröfu að allir hafi nægar tekjur til að framfleyta sér og sínum á sómasamlegan hátt. Að við bjóðum ekki upp á samfélag sérlausna fyrir fátæka sem myndast með biðröðum á hjálparstofnunum, svo dæmi sé tekið. Að allir hafi rétt til að lifa með reisn og því verði ekki náð nema að lágmarkslaun, hvort sem það eru samfélagslaun í formi fjárhagsaðstoðar, tryggingabóta og atvinnuleysisbóta eða samningar á milli verkalýðfélaga og atvinnurekaenda, að allir hafi tekjur sem dugi til þess að lifa sómasamlega lífi. En þannig er það því miður ekki í dag, góðir borgarfulltrúar. Fjárhagsaðstoðin og atvinnuleysisbæturnar standa í stað á meðan verðbólgan stígur. Þeir fátæku verða fátækari og við þær aðstæður er tillaga sem þessi réttlætanleg.
Tillagan er þá þessi:
Lagt er til að þeir íbúar borgarinnar sem eru atvinnulausir og þeir sem þiggja fjárhagsaðstoð fái frítt á sundstaði borgarinnar og frí notendakort að þjónustu Borgarbókasafns út árið 2010. Borgarstjóri útfæri nánar framkvæmd tillögunnar.
Og að lokum vil ég árétta það að í samskiptum mínum við starfsfólk borgarinnar tel ég að tryggja megi það að atvinnulausir og fólk á fjárhagsaðstoð geti notið þessa án þess að verða sér á nokkurn hátt til minnkunar.
Category : Úr borginni
Lækkun á framlögum við borgarstjórnarflokka
January 29th, 2010 // 12:18 am @ Þorleifur Gunnlaugsson // Engar athugasemdir
Forsætisnefnd 29 01 10
Lögð fram að nýju svohljóðandi breytingatillaga borgarfulltrúa Vinstri grænna við fjárhagsáætlun ársins 2010, sem vísað var til forsætisnefndar á fundi borgarstjórnar 15. f.m., sbr. bréf skrifstofustjóra borgarstjórnar, dags. 17. s.m.:
- Lagt er til að sérfræðiaðstoð til borgarstjórnarflokka verði lækkuð um 15.000 þ.kr. Sparnaður verði færður á liðinn ófyrirséð.
- Jafnframt lagt fram minnisblað skrifstofustjóra borgarstjórnar um málið, dags. 27. þ.m.
Afgreiðslu málsins er frestað.
Þorleifur Gunnlaugsson óskar bókað:
Fram hefur komið að greiðsla Reykjavíkurborgar til stjórnmálasamtaka hækkaði úr 13,9 milljónum króna árið 2006 í 32,75 milljónir árið 2007. Undanfari þessarar hækkunar var að árið 2006 var ákveðið að ýmis kostnaður sem áður féll á sveitarfélög við alþingis- og forsetakosningar skyldi framvegis greiddur af ríkissjóði en vafasamt er að réttlæta það að þessar breytingar leiddu af sér færslu fjármuna til stjórnmálaflokka í Reykjavík.
Það hefur einnig komið fram að framlög Reykjavíkurborgar til stjórnmálasamtaka eru meira en helmingi hærri en framlög annarra sveitarfélaga, svo sem Kópavogs, Akureyrar og Garðabæjar ef miðað er við höfðatölu. Það er hinsvegar ljóst að Reykjavíkurborg er skylt skv. lögum að veita þeim stjórnmálasamtökum, sem uppfylla skilyrði ákvæðisins, fjárframlög til starfsemi sinnar, og skal heildarfjárhæðinni skipti milli þeirra í hlutfalli við atkvæðamagn í næstliðnum borgarstjórnarkosningum en í lögum er ekki getið um upphæð framlagsins.
Færa má rök fyrir því að borgarstjórnaflokkar, sérstaklega þeir sem eru í minnihluta, þurfi á fjárframlögum að halda til þess að sækja sérfræðiaðstoð en sú mikla hækkun sem orðið hefur á framlögum undanfarin ár er langt umfram þá þörf. Lækkun framlaga til stjórnmálaflokka svarar kalli tímans þegar mikill niðurskurður kallar á forgangsröðun í þágu velferðarmála. Skerðing á fjármagni til stjórnmálaflokka, hvort sem það er frá einkafyrirtækjum eða opinberum aðilum, færir þá nær þeim tíma þegar starfsemin var fyrst og fremst byggð á félögunum í flokkunum sjálfum.
Vilhjálmur Þ. Vilhjálmsson og Júlíus Vífill Ingvarsson óska bókað:
Fulltrúar allra flokka í borgarstjórn tóku þátt í eða gerðu ekki athugasemdir við þá ákvörðun að hækka framlög til borgarstjórnarflokkanna árið 2007, þ.á.m. fulltrúar Vinstri grænna. Það er því líkast því að athugasemdir Þorleifs Gunnlaugssonar komi nú fram í aðdraganda prófkjörs VG og beri að skoðast með tilliti til þess.
Ólafur F. Magnússon óskar bókað:
Ég tel það óhæfu að fjórflokkarnir séu enn að nýju að úthluta sér milljóna framlögum sem koma úr vasa borgarbúa vegna ársins 2010. Gera verður kröfu til þess að fjórflokkurinn í Borgarstjórn Reykjavíkur geri grein fyrir því hvernig hann ráðstafar milljónatugum á sama tíma og engir styrkir eru ætlaðir til F-listans í Borgarstjórn Reykjavíkur.
Þorleifur Gunnlaugsson óskar bókað:
Tillaga borgarstjórnarflokks Vinstri grænna um lækkun framlaga til borgarstjórnarflokka var lögð fram við afgreiðslu fjárhagsáætlunar í desember sl. Henni var vísað til forsætisnefndar og forseti borgarstjórnar ákvað sjálfur að setja hana á dagskrá þessa fundar.
Bókun fulltrúa VG ætti því ekki að koma á óvart og fullyrðingum um það að hann sé að nýta sér nefndina í persónulegu hagsmunaskyni er vísað til föðurhúsanna. Þar að auki skal það áréttað að allar ákvarðanir um fjármál borgarinnar sem teknar voru árið 2007 ber að endurskoða, þó ekki væri nema vegna þess að síðan þá hefur fjárhagur Reykjavíkur breyst til hins verra, eins og öllum ætti að vera kunnugt.
Category : Úr borginni
Borgarstjórabústaður við Úlfljótsvatn
January 29th, 2010 // 12:15 am @ Þorleifur Gunnlaugsson // Engar athugasemdir
Forsætisnefnd 29 01 10
3. Lagt fram bréf skrifstofustjóra borgarstjórnar varðandi gjaldtöku fyrir afnot af borgarráðsbústað við Úlfljótsvatn.
Forsætisnefnd staðfestir ákvörðun skrifstofustjóra fyrir sitt leyti.
Reykjavík, 28. janúar 2010
Forsætisnefnd
Varðandi gjaldtöku fyrir afnot af borgarráðsbústað við Úlfljótsvatn
Tekin hefur verið ákvörðun um það að frá 1. febrúar nk. muni skrifstofa borgarstjórnar taka gjald fyrir afnot af svokölluðum borgarráðsbústað við Úlfljótsvatn. Gjaldið mun fylgja gjaldskrá orlofshúsa Starfsmannafélags Reykjavíkurborgar.
Með vísan til umfjöllunar um málið í forsætisnefnd tilkynnist nefndinni þetta hér með.
Ólafur Kr. Hjörleifsson
Skrifstofustjóri borgarstjórnar
Category : Úr borginni
Heildarstefna OR
January 28th, 2010 // 12:11 am @ Þorleifur Gunnlaugsson // Engar athugasemdir
Borgarráð 28 01 10
Lögð fram heildarstefna Orkuveitu Reykjavíkur, sem samþykkt var á fundi stjórnar fyrirtækisins 30. f.m., sbr. bréf stjórnarformanns og forstjóra, dags. 31. s.m. Jafnframt lagt fram svar borgarstjóra, dags. í dag, við fyrirspurn borgarráðsfulltrúa Samfylkingar um málið, sbr. 5. lið fundargerðar borgarráðs frá 14. þ.m. R10010054
Borgarráðsfulltrúi Vinstri grænna óskar bókað:
Samfélagslegt mikilvægi Orkuveitu Reykjavíkur hefur aldrei verið skýrara. Ímynd fyrirtækisins hefur borið hnekki og fjárhagslegum erfiðleikum er þar ekki einum um að kenna. Bitrumálið, REI draugurinn, vöntun á gagnsæi og aðgengi og rekjanleika ákvarðana, umræða um ofurlaun og ábendingar um að fyrirtækið fjarlægist eigendur sína, íbúa Reykjavíkur, Akraness og Borgarbyggðar, eiga þar hlut að máli. Brýn nauðsyn er á að OR vinni sig út úr þessum ímyndarvanda á trúverðugan hátt þar sem hófsemi og auðmýkt er höfð að leiðarljósi. Í þeirri vegferð getur stefnumótun á borð við þá sem samþykkt var í stjórn OR skipt máli. Við lestur stefnumótunarplaggsins má ætla að verið sé að lýsa að stórum hluta stöðunni eins og hún er í dag og að sjálfsögðu á það við um margt. Það þarf þó að vera skýrt að um er að ræða framtíðarsýn sem lýsir starfseminni eins og stjórnarmenn í OR vilja sjá hana. Í þessu ljósi ber að túlka endurtekna notkun á hugtakinu ,,sjálfbærni“. Samþykkt stjórnar OR á breytingartillögu VG sem lögð var fram á stjórnarfundi 30. desember sl. er mikils virði en þar segir ,,Orkuveita Reykjavíkur er jákvæð fyrir þróunarsamvinnu. Fyrirtækið gerir ríkar siðferðilegar og umhverfislegar kröfur til allra verkefna sem fyrirtækið tekur þátt í erlendis, engu síður en á Íslandi, og tekur afstöðu til álitamála í þeim efnum á vettvangi stjórnar.“ Ofanritaður sendi nokkuð ýtarlegar breytingatillögur við stefnuplaggið til stjórnarmanna OR 8. ágúst sl. án þess að uppskera árangur sem erfiði en til athugasemdanna er vísað nú þannig að þeim verði haldið til haga því að um er að ræða lifandi stefnumótun sem alltaf er hægt að taka upp og betrumbæta. Margt gott hefur komið út úr stefnumótunarvinnunni og nú þegar opnað hefur verið á þróunarsamvinnu og skýrt kveðið á um siðferðislegar og umhverfislegar kröfur til verkefna innanlands og utan telur ofanritaður niðurstöðuna ásættanlega.
Category : Úr borginni
Miðborgarprestur
January 28th, 2010 // 12:08 am @ Þorleifur Gunnlaugsson // Engar athugasemdir
Borgarráð 28 01 10
14. Lagt fram bréf formanns sóknarnefndar og sóknarprests Dómkirkjunnar frá 15. f.m. þar sem óskað er eftir því að Reykjavíkurborg greiði áfram helming launa miðborgarprests á árinu 2010, eða 4,6 m.kr. R08090085
Borgarráðsfulltrúi Vinstri grænna leggur fram svohljóðandi tillögu:
Borgarráð sér ekki fært að greiða helming launa og launakostnað miðborgarprests. Því er erindinu synjað. Greinargerð fylgir tillögunni.
Tillaga borgarráðsfulltrúa Vinstri grænna felld með 6 atkvæðum gegn 1.
Samþykkt með 6 atkvæðum gegn 1 að styrkja verkefnið áfram með þeim hætti sem fram kemur í erindinu, kostnaður færist af liðnum ófyrirséð útgjöld.
Borgarráðsfulltrúi Vinstri grænna óskar bókað:
Mikill niðurskurður í fjárhagsáætlun Reykjavíkur annað árið í röð setur mark sitt á nauðsynlega grunnþjónustu borgarinnar. Við þessar aðstæður er það ekki verjandi að leggja 4,6 milljónir í starf miðborgarprests. Í og við miðborgina er fjöldi presta og annarra starfsmanna þjóðkirkjunnar sem þiggja laun sín af skattpeningum borgarbúa en það fjármagn ætti að duga fyrir meintri þörf á sálgæslu á svæðinu. Af hálfu borgarinnar er öðrum þáttum í starfi miðborgarprests sinnt og má þar nefna starf Þjónustumiðstöðvar Miðborgar og Hlíða, íþrótta- og tómstundasvið og velferðarsvið.
Category : Úr borginni
Framlög til borgarstjórnarflokka
January 7th, 2010 // 11:12 pm @ Þorleifur Gunnlaugsson // Engar athugasemdir
Borgarráðsfulltrúi Vinstri grænna óskar bókað:
Við gerð fjárhagsáætlunar fyrir árið 2010 lögðu borgarfulltrúar VG fram tillögu um að fjárframlög til borgarstjórnarflokka yrðu lækkuð um helming. Tillagan var byggð á því mati að nú þegar verið er að skera mikið niður vegna mennta- og velferðarmála í borginni sé það ekki verjandi að eyða 30 milljónum til starfsemi stjórnmálaflokka. Þessari tillögu var vísað til forsætisnefndar. Tillaga Ólafs F. Magnússonar um það að deilur hans við Frjálslynda flokkinn um að fjárframlög til borgarstjórnarflokks Ólafs og félaga verði leyst með þeim hætti að fjármunir renni til Mæðrastyrksnefndar er góðra gjalda verð og eru fulltrúar Frjálslynda flokksins hvattir til að skoða þá lausn vel.
Category : Úr borginni
Ræstingar
January 7th, 2010 // 11:10 pm @ Þorleifur Gunnlaugsson // Engar athugasemdir
27. Borgarráðsfulltrúi Vinstri grænna leggur fram svohljóðandi fyrirspurn:
Í fréttatíma á Stöð 2 í gærkvöldi kom fram að starfsmanni, sem áður starfaði við ræstingar í leikskóla, voru boðin nánast helmingi lægri laun við að ræsta sama leikskóla á vegum verktaka.
Því er spurt:
1. Hvað lækkaði kostnaður vegna ræstinga viðkomandi leikskóla mikið við útboðið?
2. Hversu mikill var sparnaður leikskólasviðs í síðustu úthýsingu ræstinga?
3. Hversu margir misstu störf sín hjá borginni við þessa úthýsingu?
4. Stendur til að úthýsa fleiri ræstingaverkefnum á leikskólasviði og öðrum sviðum borgarinnar?
5. Ef svo er hver verður áætlaður sparnaður af þeim úthýsingum og hversu margir munu missa störf sín hjá borginni vegna þeirra? R10010072
Category : Úr borginni
Bílastæði
January 7th, 2010 // 11:06 pm @ Þorleifur Gunnlaugsson // Engar athugasemdir
17. Lögð fram greinargerð framkvæmdastjóra Bílastæðasjóðs varðandi hugsanlega sölu bílastæðahúsa Bílastæðasjóðs, ódags., sbr. samþykkt umhverfis- og samgönguráðs 15. f.m. og 8. lið fundargerðar borgarráðs frá 3. september sl. R08090151
Vísað til borgarlögmanns til umsagnar.
Borgarráðsfulltrúi Vinstri grænna leggur fram svohljóðandi fyrirspurn:
1. Hver er raunkostnaður v/ gjaldskyldra bílastæða í borginni?
2. Hvað þyrfti að hækka verðlagningu vegna þeirra til þess að rekstur bílastæðahúsa borguðu sig?
3. Hvernig er þessum málum háttað í nágrannaborgum Reykjavíkur á Norðurlöndum?
Category : Úr borginni
Félagsþjónusta sveitarfélaga
December 10th, 2009 // 11:16 pm @ Þorleifur Gunnlaugsson // Engar athugasemdir
31. Lagt fram frumvarp til laga um breytingu á lögum nr. 54/2006 um atvinnuleysistryggingar, lögum nr. 40/1991 um félagsþjónustu sveitarfélaga, og lögum nr. 95/2000 um fæðingar- og foreldraorlof, með síðari breytingum, 273. mál. R09120011
Borgarráðsfulltrúi Vinstri grænna leggur fram svohljóðandi tillögu að umsögn borgarráðs:
Borgarráð leggst eindregið gegn breytingum á lögum nr. 40/1991, um félagsþjónustu sveitarfélaga sem heimilar sveitarstjórnum að setja reglur sem binda fjárhagsaðstoð viðkomandi sveitarfélags skilyrðum. Varla er hægt að skilja 28. gr. frumvarpsins öðruvísi en svo, að heimilað verði að taka fjárhagsaðstoðina af viðkomandi að nokkru leyti eða öllu, verði ákveðin skilyrði ekki uppfyllt. Fjárhagsaðstoð veita sveitarfélög þeim sem ekki eiga í önnur hús að venda og full fjárhagsaðstoð er ekki veitt nema viðkomandi hafi engar aðrar tekjur. Aðstoðin hefur alla tíð verið mjög lág í krónum talið, þannig að fæstir gætu hugsað sér að lifa á henni einni saman. Velferðarráð Reykjavíkur hefur nýverið samþykkt að setja í gang virkniáætlun fyrir þá sem þiggja fjárhagsaðstoð en eftir sem áður verða alltaf til þeir sem heilsu sinnar vegna geta ekki uppfyllt sett skilyrði. Íslendingar hafa allt frá Grágásarlögum haft á því reglu að skylda sé til að færa fram þá sem ekki geta sjálfir: „Svo er mælt að sína ómaga á hver maður fram að færa á landi hér. Móður sína á maður fyrst fram að færa, en ef hann orkar betur, þá skal hann færa fram föður sinn. Nú má hann betur, þá skal hann börn sín. Nú má hann betur, þá skal hann systkin sín fram færa. Nú má hann betur, þá skal hann færa fram þá menn er hann á arf að taka eftir og þá menn er hann hefir arftaki tekna. Nú má hann betur og þá skal hann framfæra leysing sinn þann er hann gaf frelsi. Ef nokkur þeirra manna gengur að hans ráði er nú var taldur enda eigi hann fé til að færa þá fram þá verður hann útlagur gerr of það ef þeir ganga.“ – Vísað frá
Frávísunartillagan samþykkt með 4 atkvæðum gegn 1.
Samþykkt með 4 samhljóða atkvæðum að fela borgarlögmanni að ganga frá umsögn um frumvarpið.
Borgarráðsfulltrúi Vinstri grænna óskar bókað:
Félagsmálaráðherra hefur, að áeggjan meirihluta velferðarráðs Reykjavíkurborgar, lagt fram frumvarp sem inniber heimild til sveitarfélaga til að svipta fátækustu íbúa sína lífsviðurværinu. Með því að vísa frá tillögu VG þar sem 28 gr. frumvarpsins er hafnað, heldur meirihluti borgarráðs áfram vegferð fulltrúa sinna í velferðarráði þar sem ráðherra er hvattur til að heimila alvarlega aðför að þeim sem verst standa.
Category : Úr borginni
Ýmislegt
December 10th, 2009 // 11:15 pm @ Þorleifur Gunnlaugsson // Engar athugasemdir
22. Lagt fram svar borgarstjóra frá 9. þm. við fyrirspurn borgarráðsfulltrúa Vinstri grænna og Samfylkingar um hugmyndaþing, sbr. 18. lið fundargerðar borgarráðs frá 19. f.m. R09090017
23. Lagt fram svar borgarstjóra frá 9. þ.m. við fyrirspurn borgarráðsfulltrúa Vinstri grænna um gjaldskrárhækkanir o.fl., sbr. 11. lið fundargerðar borgarráðs frá 26. f.m. R09050032
24. Lagt fram svar borgarstjóra frá 11. f.m. og innri endurskoðanda frá 9. s.m. við fyrirspurn borgarráðsfulltrúa Vinstri grænna og Samfylkingar um víxil gefinn út af eignarhaldsfélaginu Fasteign, sbr. 31. lið fundargerðar borgarráðs frá 18. júní sl. R09050103
Category : Úr borginni
