Tillaga hjá Sambandi íslenskra sveitarfélaga
May 8th, 2010 // 11:03 pm @ Þorleifur Gunnlaugsson // Engar athugasemdir
Þorleifur Gunnlaugsson borgarfulltrúi og varaformaður Sambands íslenskra sveitarfélaga lagði í dag til í stjórn Sambandsins að Lögfræðisviði þess yrði falið að meta skýrslu Rannsóknarnefndar Alþingis með tilliti til upplýsinga sem þar koma fram og varða sveitarfélögin og lærdóma er viðkoma stjórnkerfi, stjórnsýslu og fjármálastjórn, siðareglur, reglur um skráningu hagsmunatengsla og annað sem að gagni mætti koma fyrir sveitarfélögin. Tillagan var samþykkt en lögfræðisviðinu er falið að skila skýrslu um málið fyrir þing Sambands íslenskra sveitarfélaga sem haldið verður í haust en skýrslugerðin verði jafnframt innlegg í endurskoðun sveitarstjórnarlaga.
Tillagan er hér að neðan:
———
Tillaga frá Þorleifi Gunnlaugssyni.
Stjórn sambandsins felur Lögfræði- og velferðarsviði að meta skýrslu Rannsóknarnefndar Alþingis með tilliti til upplýsinga sem þar koma fram og varða sveitarfélögin og lærdóma er viðkoma stjórnkerfi, stjórnsýslu og fjármálastjórn, siðareglur, reglur um skráningu hagsmunatengsla og annað sem að gagni mætti koma fyrir sveitarfélögin.
Lögfræði- og velferðarsviði er falið að skila skýrslu sinni þannig að hún geti nýst sem innegg í þing sambandsins í haust, jafnframt því sem hún gæti nýst í tengslum við endurskoðun sveitarstjórnarlaga.
Greinargerð:
Í skýrslu rannsóknarnefndar Alþingis er ýtarleg umfjöllun um stjórnkerfi og eftirlitsstofnanir íslenska ríkisins og þær umbætur sem nefndin telur þurfa að eiga sér stað á þeim vettvangi.
Þá er í skýrslu vinnuhóps um siðferði að finna umfjöllun um starfshætti og siðferði í stjórnsýslu og stjórnmálum, þ.m.t. varðandi samskipti embættismanna, stjórnmálamanna og einkaaðila.
Efni skýrslunnar snýr eðli máls samkvæmt hvorki beint að stjórnkerfi eða stjórnsýslu sveitarfélaga, enda komu þau ekki með beinum hætti að þeim atburðum sem skýrslan fjallar um. Stjórnkerfi sveitarfélaga er að mörgu leyti ólíkt stjórnkerfi ríkisins. Æðsta vald innan sveitarfélaganna er í höndum fjölskipaðs stjórnvalds, sveitarstjórnar, sem óhjákvæmilega kallar á ákveðna formfestu við ákvarðanatöku, auk þess sem þar sitja fulltrúar bæði meiri- og minnihluta, en ráðherrar fara einir með æðstu stjórn í stjórnsýslu ríkisins, hver á sínu sviði.
Þrátt fyrir þetta hefur skýrslan að geyma mikinn lærdóm um stjórnsýslu, stjórnmál og siðferði sem nýtast þarf öllum þeim sem starfa við opinbera stjórnsýslu hér á landi, jafnt embættismönnum sem kjörnum fulltrúum.
Mikilvægt er því að lærdómur skýrslunnar verði nýttur eins og kostur er við áframhaldandi þróun stjórnkerfis og stjórnsýslu sveitarfélaganna. Í því sambandi hefur skrifstofustjóri borgarstjórnar Reykjavíkur lagt til að m.a. verði tekin til skoðunar eftirfarandi atriði og er tekið undir það:
a. Ábyrgðar- og verksvið annars vegar embættismanna, þ.m.t. sveitarstjórna, og hins vegar nefnda, ráða og kjörinna fulltrúa. Boðleiðir, stöðuumboð, valdmörk og skipurit.
b. Verkaskipting stjórnmálanna, aðkoma minnihluta, lýðræði og umboð kjósenda.
c. Stjórnarfyrirkomulag B-hluta fyrirtækja, þ.m.t. verkaskipting, stjórnarskipan, eftirlit, boðleiðir og upplýsingagjöf.
d. Siðareglur starfsfólks og kjörinna fulltrúa sem og reglur um skráningu á fjárhagslegum hagsmunum og trúnaðarstörfum borgarfulltrúa.
e. Skráning upplýsinga, aðgangur að upplýsingum og trúnaður milli aðila.
f. Reglur um gerð fjárhagsáætlunar, fjár- og áhættustýring, áhættumat og eftirlit.
g. Samskipti við einkaaðila sem fara með opinbert fé, hvort sem er á grundvelli samninga, s.s. þjónustu- og verksamninga, eða styrkveitinga.
Category : Vefgreinar
